Use Telegram for secure communication
सोशल मीडियाच्या उदयामुळे संवाद प्रणाली विकसित झाली असतानाच, दस्ताऐवजांची देवाणघेवाण करणेही अधिकाधिक महत्वाचे बनले आहे. डॉक्युमेंट फाईल, पीडीएफ, फोटो, व्हिडिओ यासारखे दस्तावेज पाठवण्यासाठी टेलिग्राम हा एक सुरक्षित पर्याय मानला जातो. आज सर्वत्र व्हाट्सअप लोकप्रिय असले तरी मोठ्या फाइल्स आणि त्या सुरक्षित ठेवण्याच्या दृष्टीने टेलिग्रामचा मोठ्या प्रमाणात वापर होऊ लागला आहे.
टेलिग्रामची स्थापना 2013 मध्ये रशियन उद्योजक पावेल डुरोव आणि त्यांचा भाऊ निकोलाई डुरोव यांनी सेंट पीटर्सबर्ग, रशिया येथे केली होती. पावेल डुरोव यांनी पूर्वी व्ही के नावाची सोशल नेटवर्किंग वेबसाइटची स्थापना केली होती, जी रशियातील सर्वात लोकप्रिय वेबसाइटपैकी एक बनली होती. 2012 मध्ये, रशियन सरकारने राजकीय विरोधकांवर लक्ष ठेवण्यासाठी व्ही के मधून डेटा मिळवण्याचा प्रयत्न केला. रशियन सरकारकडून होणाऱ्या दबावाला तोंड देऊन डुरोव यांनी रशिया सोडण्याचा आणि टेलिग्राम विकसित करण्याचा निर्णय घेतला. त्यांना अशा मेसेजिंग ऍप्लिकेशनची आवश्यकता होती जी सुरक्षित आणि गोपनीय असेल आणि ज्याचा वापर सरकार किंवा इतर कोणत्याही तिसऱ्या पक्षाकडून सहजपणे ट्रॅक केला जाऊ शकणार नाही.
टेलिग्राम अनेक नवीन वैशिष्ट्यांसह डिझाइन केले गेले जे त्यावेळी इतर मेसेजिंग ऍप्लिकेशन्समध्ये उपलब्ध नव्हते. यात एंड-टू-एंड एन्क्रिप्शन, स्वयं-विनाशकारी संदेश आणि गुप्त चॅटचा समावेश होता. टेलिग्रामने लवकरच लोकप्रियता मिळवली आणि जगभरातील लाखो लोकांनी ते वापरणे सुरू केले. सुरक्षा आणि गोपनीयतेसाठी टेलिग्रामची प्रशंसा केली जाते. वैयक्तिक संवाद ते मोठ्या ग्रूपमध्ये माहिती शेअर करण्यासह विविध उद्देशांसाठी वापर केला जातो. टेलिग्राम ही एक मोफत मेसेजिंग ऍप्लिकेशन आहे जी तुम्हाला मजकूर, फोटो, व्हिडिओ आणि इतर फाइल्स पाठवून आणि प्राप्त करून जगभरातील लोकांशी त्वरित आणि सुरक्षितपणे संवाद साधण्याची सुविधा देते.
इतर ऍप्लिकेशन्सच्या तुलनेत टेलिग्रामची काही वेगळी वैशिष्ट्ये आहेत. टेलिग्राम हे अत्यंत वेगवान आहे, त्यामुळे तुम्ही तुमच्या संदेशांचे त्वरित उत्तर मिळू शकता. एंड-टू-एंड एन्क्रिप्शनसह सुरक्षित आहे, याचा अर्थ तुमचे संदेश केवळ तुम्ही आणि तुम्ही ज्या व्यक्तीशी बोलत आहात त्या व्यक्तीलाच वाचता येतील. गुप्त चॅट वापरू शकता जे स्वयं-विनाशकारी आहेत आणि त्यामध्ये अतिरिक्त सुरक्षा वैशिष्ट्ये आहेत. तुम्ही 200,000 सदस्यांपर्यंतचे मोठे ग्रूप तयार करू शकता. इतक्या मोठ्या संख्येने ग्रुप तयार करण्याची सुविधा इतर कोणत्याही ऍप्लिकेशन्समध्ये नाही. तुम्ही अनेक सदस्यांपर्यंत माहिती प्रसारित करण्यासाठी चॅनेल तयार करू शकता. हा अनुभव घेण्यासाठी टेलिग्रामचा वापर नक्की करून बघा.
